O Pullo Mio!

L-epifanija ta’ George Pullicino: Napli tegħreq fl-iskart.

Malta u Napli għandhom żewġ affarijiet komuni. Ix-xemx u l-korruzzjoni.

Din id-darba dan il-blog jaqbel ma’ l-impjegat tagħna Pullicino. Mingħajr l-installazzjoni ta’ l-engineering landfills u ta’ l-inċeneratur, Malta kienet tispiċċa eżattament bħal Napli.

L-għażla ta’ Pullicino kienet: jew immutu bil-kankru biż-żibel barra jew immutu bil-kankru biż-żibel maħruq. Almenu meta nkunu morda, inkunu nistgħu nippassiġġaw fit-toroq nodfa ta’ Malta qalb l-għelieqi msaqqin bil-pestiċidi.

George Pullicino, fl-artiklu blogganti tiegħu, jibda biex jikkwota lill-President Taljan, Giorgio Napolitano: "Mhux biss inħossni nkwetat, inħossni allarmat!".

George Pullicino flok ministru missu laħaq interpretu tal-lingwi fl-unjoni ewropea. Ikollu paga aħjar u xogħol aħjar għax il-facebook ikun aċċessibbli.

Giorgio Napolitano fil-verità qal: “Non sono preoccupato, ma allarmato.” Bil-Malti: “M’inix inkwetat, imma allarmat.” Din is-sentenza tfisser ħafna.

Dan Napolitano ġralu bħar-reġina Eliżabetta meta tiġi żżur Malta minn fuq dar il-poplu biex tipprova tieħu nejka fil-qamar il-għasel. Kieku r-reġina Eliżabetta tiġi Malta u tgħaddi mit-triq li daħħlek sal-pjazza ta’ Ħaż-Żebbuġ taħseb li l-pilota ħadha l-Iraq u mhux Malta. Għax minn dik it-tip ta’ triq, fil-miġja tagħha lejn f’Malta: il-Gonz qatt m’għaddieha.

Żmien ilu Napolitano kien faħħar lil Napli u feraħ għax fl-aħħar ra t-toroq nodfa u x-xemx ta’ Napli reġgħet ġiet f’lokha. Ma ndunax li naddfu ż-żewġ toroq ta minn fejn għadda bil-karozza.

L-istorja bdiet eżatt kif qal Pullicino: kollox beda mill-protesti tan-Naplitani għax ħadd ma jrid l-iskart ħdejh.

Id-differenza hija li Pullicino baqa’ għaddej u ħassu waħdu u r-residenti protestanti kellhom ibaxxu rashom u li n-Naplitani m’aċċettawx, imtlew biż-żibel għax ma baxxewx rashom.

Pullicino qassar l-istorja ta’ Napoli u waħħal kollox fil-protesti taċ-ċittadini li għandhom ibaxxu rashom fuq deċiżjonijiet politiċi biex juri li hu għamel id-deċiżjonijiet it-tajba u li l-poplu seta’ jfixkilhom b’messaġġ subliminali konta l-laburisti.

L-istorja ta’ Napli hija iżjed kumplessa minn sempliċi bloggata ta’ ħames paragrafi stil Pullicino.

Pullicino jikteb: “Sa ftit taż-żmien ilu l-iskart tan-naħa ta' isfel ta’ l-Italja kien jiġi trasportat lejn pajjiżi Ewropej oħra jew jintefa’ f'miżbliet illegali. Issa li dawn il-pajjiżi Ewropej ma baqgħux jaċċettaw l-iskart, Napli u r-reġjun spiċċa jerqgħu fl-iskart.”

Ruma u Milan għandhom ftit iżjed residenti minn Napli u m’għandhomx din il-problema. Il-problema li ma semmix Pullicino hija l-mafja. Magħrufa wkoll bħala kamorra.

Il-problema hija li l-kamorra (mafja) mhijiex dik li toqtol lin-nies għal vendetta jew xi serq. Il-kamorra tinsab fil-kmand ta' l-amministrazzjoni ċentrali ta’ Ruma, ta’ Malta u dik li tikkmanda l-Ewropa kollha. In-Napli qegħdin fil-ħara għax mhumiex Maltin: ma jbaxxux rashom. Hija l-injoranza tal-poplu li jbusu l-idejn tal-mafjużi: bil-voti.

Huwa sempliċi li tikteb li Napli ma ridux l-iskart maġenbhom u tieqaf hemm. In-Naplitani riedu tassew l-iskart separat. Imma l-gvern waqqaf l-impjegati tas-servizz pubbliku milli jagħmel dan u ħalla f’idejn il-privat u nteffqu ħafna flus u l-privat m’għamilx xogħolu u ma ħax il-kastig li ħaqqu. Il-kastig bħas-soltu jieħdu l-poplu.

Minnħabba f’hekk Prodi ried iżid ħames inċenerituri f’din l-art u ġie jitnejjek mill-pariri tan-nies. Il-protesti iżjed qamu, il-kamorra iżjed tgawdi.

Waħda mill-protesti ma kinitx li n-Naplitani ma ridux l-iskart maġenb djarhom imma kienet biex tiġi protetta ż-żona tal-Park Nazzjonali tal-Vessuvju.

Pullicino jagħlaq fil-bloggata tiegħu: “Pier Ferdinando Casini llum akkuża lill-Ministru ta’ l-Ambjent Taljan, Pecoraro Scanio; li jmexxi ukoll il-Partit tal-Ħodor, li s'issa kien biss "il signor no", jgħid le għal kollox. Jekk għandux raġun jew le Casini ma nafx. Li hu żgur huwa li f'Napli hemm bżonn min jiddeċiedi u jimxi kontra l-kurrent inkella se jibqgħu jerqgħu fl-iskart !

Wara li Pullicino waħħal fiċ-ċittadini bħalma Gonzi jwaħħal fil-ħaddiema meta jkun hemm falliment, il-Pullicino ma jafx jekk Casini għandux raġun jew le.

Pullicino ma jafx jekk it-tort huwiex ta’ min irid ilma nadif, arja nadifa, bajd u ġobon mingħajr diossina. It-tort għal Pullicino huwa ta’ min irid park, siġra, bajja mingħajr kanali tossiċi u dekontaminaturi li jaħdmu.

It-tort huwa ta’ min jgħid il-verità fuq l-inċenerituri u ta’ popolazzjoni ċivili li jridu riżultati għall-ambjent bħad-Daniżi u l-Kalifornjani.


Biex tikteb kumment dwar l-artiklu, “O Pullo Mio!": għafas hawn.