Memomosesswali ( 2 )

....għafas hawn biex taqra l-ewwel parti

- It-tieni u l-aħħar parti -

Fil-Ġenesi, is-serp jikkonvinċi lil Eva biex tiekol it-tuffieħa li mhux suppost tiekol. Eva tagħti gidma lit-tuffieħa u taqa’ f’nagħsa kbira mill-liema Adam iqajjimha b’bewsa. Le, din hija Snowhite! Imma jekk meta kontu żgħar kienu jgħidulkom li Snowhite hija reliġjon: kontu temmnuhom! Insomma, Adam u Eva jieklu t-tuffieħa u Alla jkeċċihom mill-ġenna ta’ l-art. Imn’alla Alla ma ndunax Adam x’kien għamel bil-banana!

Wara l-artiklu tal-bieraħ; kellmuni omosesswali u transesswali dwar il-memorandum, isostnu li ma kienu jafu b’xejn. Ma tistax ittihom it-tort kollu peress li l-istqarriji huma kollha moqrija bejn il-linji.

Fil-memorandum, l-isqof kiteb hekk:
” Għalhekk qed nipproponulkom li fil-Programm Elettorali, b’konvinzjoni, twiegħdu lill-poplu Malti li tagħtu prijorità lill-familja. U b’familja nifhmu: l-għotja ta’ xulxin imfissra bir-rabta sal-mewt, mibnija fuq iż-żwieġ ta’ bejn mara u raġel għall-imħabba u l-għajnuna ta’ xulxin kif ukoll għat-tnissil u t-trobbija ta’ l-ulied.....”

“....Nifhmu li din il-prijorità trid tidher b’mod konkret f’kull leġislazzjoni u f’kull att amministrattiv, kif ukoll fl-oqsma ta’ l-edukazzjoni, tal-politika soċjali (b’mod partikolari tas-social housing), tal-finanzi u tal-media ta’ l-Istat.....”.

”...Biex inkunu mifhuma sewwa, irridu ngħidu ċar u tond li nemmnu u nifhmu li persuni li qed jgħixu f’xi forma oħra ta’ relazzjoni, jew fi żwieġ li tkisser, jew barra ż-żwieġ, għandhom ikollhom kull għajnuna u protezzjoni tad-drittijiet fundamentali tagħhom bħala persuni.
Imma din l-għajnuna m’għandhiex toħroġ awtomatikament mir-relazzjoni li mhix żwieġ. L-Istat tagħna, waqt li ma jistax jinjora dawn ir-relazzjonijiet, ma jistax jistma bl-istess mod il-forom kollha ta’ konvivenza soċjali....”

Fi ftit kliem il-knisja qegħda tgħid li l-omosesswali għandhom ikollhom l-istess drittijiet tal-miżżewġin, però ma jistax ikollhom id-drittijiet tal-miżżewġin.

L-eterosesswali jisseparaw u l-omosesswali jridu jiżżewġu! Ara vera kollox bil-kontra jagħmlu dawn.

Il-knisja qegħda tipproponi (kelma diplomatika flok timponi) li (1) jitwaqqaf kumitat favur iż-żwieġ bejn raġel u mara u li l-istat għandu jgħin it-tifrik taż-żwieġ dejjem bejn raġel u mara. (2) Iż-żwieġ stabbli qatt m’għandu jkun diskriminat: dan ifisser dak li mhuwiex stabbli jista’ jkun diskriminat bla problemi ta’ xejn. (3) Jingħataw iżjed fondi mill-istat biex fl-edukazzjoni, fil-media u fid-deċiżjonijiet amministrattivi jkun hemm propaganda favur il-familja eterosesswali. (4) Isiru korsijiet bejn ir-refuġjati afrikani u l-bjondi smini li deħlin għaż-żwieġ ankè jekk ċivili. (5) Korsijiet fuq l-aspetti mportanti taż-żwieġ, kollox imħallas mill-istat. (6) Għal darb’oħra jipproponu kampanja edukattiva fl-iskola favur iż-żwieġ bejn mara u raġel. (7) Jissaħħu l-miżuri għal kundizzjonijiet tax-xogħol għal min hu miżżewweġ u għandu familja. (8) Appoġġ finanzjarju lill-NGOs favur il-familja. (9) Is-servizz għall-istat li jagħtu koppji li jkollhom ulied, ikollhom appoġġ finanzjarju u vantaġġi oħra, peress li kulħadd qed jaħxi bil-condom u t-tfal mhumiex jiġu.

Dan il-blog għandu t-tweġiba tal-gvern b’esklussiva. Ikun min ikun fil-gvern:

“Inti tajtni disa’ proposti imma ovvjament, kif inti taf, ma nistax naqdik f’kollox. Ejja ngħidu naqdik san-nofs ta’ proposta1 għax it-tieni nofs diġà qiegħed nadqik, proposta 6, fil-każ inqabbad it-teacher tal-P.E. jgħallem dan is-suġġett għax għandu ħafna free lessons u proposta 3 fil-każ nagħti iżjed flus lill-iskejjel tal-knisja. Imma sa hemm se nasal!”

Il-bullying psikoloġiku fuq l-istudenti omosesswali mhuwiex ġej mill-istudenti sħabu imma mill-knisja u mill-gvern!

M’għandi l-ebda dubju li l-knisja se taċċetta it-tweġiba tal-gvern.

Għandi ħabib tiegħi, jismu Ġilormu, li tant kemm iħossu waħdu, imma tant kemm iħossu waħdu li l-Ġimgħa jibgħat e-mail lilu nnifsu u t-Tnejn fil-għodu jixgħel il-computer u jifraħ li rċieva e-mail. Din hija l-istorja ta’ meta l-knisja tibgħat memo lill-gvern.

Omosesswali ieħor bagħtli e-mail u qalli li jħoss li għandu jmur il-knisja għax il-knisja hija ta’ kulħadd bħal ma’ post tax-xogħol huwa ta’ kulħadd u xorta ma jaċċettawkx.

Jiena weġibtu li post tax-xogħol ma jinfluwenzax soċjetà imma jiġi nfluwenzat mill-knisja. Kif kien jgħid Dalli: “trid taqbad il-barri minn qrunu” u mhux l-abbatini mill-bajd.

Dan l-omosesswali baqa’ jinsisti li jrid imur jattendi l-knisja bħala appoġġ għall-qassisin omosesswali. Il-knisja għandha predikaturi omossesswali u l-omosesswali jmorru l-knisja. Sistema bilaterali. Ma jitħamlux imma jmorru għand xulxin bħala solidarjetà.

L-omosesswali li jmur il-knisja, huwa tassew omosesswali. Jieħu pjaċir min itihulu minn wara. Il-qassis li jattendi attivitajiet omosesswali, huwa qassis tassew. Għandu ċans jgħabbi.

Mix-xena internazzjonali: ir-Ratzinger iltaqa’ mal-fidili fi pjazza San Pietru għall-ewwel Angelus tiegħu tas-sena l-ġdida 2008. Fil-jum dedikat għall-paċi fid-dinja ir-Ratzinger ikkomunika dik li l-knisja rumana tikkonsidra t-theddida għall-paċi.

Il-gwerra? Il-ġuħ? L-injoranza? L-imperjaliżmu? Ir-riżorsi ta’ l-enerġija? L-armi? Le, xejn minn dan!

Il-ferħ tal-paċi huma mhedda mill-omosesswali. Ratzinger qal li “l-familja naturali bħala għaqda intima ta’ ħajja u mħabba, ibbażata fuq iż-żwieġ bejn mara u raġel tipprovdi post ewlieni fil-forma ta’ bniedem u s-soċjetà. Il-familja hija meqjusa bħala l-ewwel soċjetà naturali, istituzzjoni divina li tinsab fil-bażi tal-ħajja. Kull min jhedded l-istituzzjoni tal-familja: jhedded il-paċi tal-komunità nazzjonali u internazzjonali peress li din thedded il-bażi essenzjali.”

Bl-Angelus, il-papa ddikkjara gwerra: l-omosesswalità. Se jużaw il-politika, il-memorandums, il-media u kull ekonomija possibbli.

Kollox f’isem Ġesù Kristu. Jekk it-tweġiba hija Kristu mela l-mistoqsija hija żbaljata. Jekk Ratzinger huwa kristjan, Kristu mhuwiex.

Kattoliku ta’ vera jissepara l-iStat u l-knisja, jiġifieri bejn reat u dnub. Dan indikah il-mexxej ta’ l-insara stess meta qal: “Għatu lil Ċesare dak li hu ta’ Ċesare u lil Alla dak li hu ta’ Alla.” Ma qalx għamlu Alla lil Ċesare.

Patri Mark Montebello qal li l-kariga ta’ Ratzinger bħala papa hija ċajta goffa. Patri Mark ma kienx qiegħed jiċċajta.


Biex tikteb kumment dwar l-artiklu, "Memomosesswali ( 2 )": għafas hawn.