It-Tramuntana fil-Kenya

Il-Kenya twieled protettur taħt l-Ingilterra. Fl-1920, wara l-immigrazzjoni qawwija Ingliża li marru fl-artijiet l-iżjed produttivi (White Highlands), saret kolonja tal-Kenya. Il-kolonizazzjoni Ingliża ħadet l-artijiet produttivi kollha lill-bdiewa, u ġabithom fil-miżerja.

Imkeċċija mill-artijiet tagħhom, il-Mau Mau (tribù tal-kikuyu) sfaw kostretti joqogħdu fil-faqar u fil-miżbla u jaħdmu b’pagi ta’ skjavi għall-Ingliżi. Il-kikuyu ddeċidew li jqumu fuq tagħhom u jiġġieldu paċifikament biex jieħdu almenu parti mill-artijiet tagħhom u biex jerġa’ jkollhom l-indipendenza.

Ir-reazzjoni Ingliża kienet feroċi: mingħajr ma ħasbu li jagħmlu ftehim magħhom, l-awtoritajiet Ingliżi kkunsidraw lill-Mau Mau bħala terroristi u bdew propaganda qawwija kontra tagħhom. Il-gwerra, magħrufa bħala “ġlieda kontra t-terroriżmu” kienet ta’ krudeltà qawwija. Torturi, vjolenzi sesswali ta’ kull tip fuq tfal u nisa, massakri b’armijiet varji u d-deportazzjoni fil-kampi tal-konċentrament.

Il-Mau Mau kienu tassew terroristi: terrorizzati mill-Ingliżi.

Illum jidher li tgħallmu sew mill-esperjenza Ingliża.

Missjunarju mill-Kenya prova jibgħatli e-mail imma ma rnexxilux ikompliha u forsi l-anqas jibdiha. B’hekk jiena ddeċidejt li nżid u nnaqqas dak li skond jiena, l-missjunarju ried jgħid.

“ Għeżież ħuti,

qed nibgħat din iċ-ċirkolari biex inserraħ ras lil dawk kollha li talbu l-aħbarijiet tal-Maltin fil-Kenya.

B’mod speċjali lill-ministru ta’ l-affarijiet barranin Michael Frendo li mal-ewwel ħeġġeġ lill-awtoritajiet Maltin jiġu jagħtuna l-għajnuna bl-AirMalta. Solidarjetà u fratellanza li Malta biss taf toffri.

Ninsab ċert li pajjiżi oħrajn kienu jħallu lil ħuthom hemmhekk u jibgħatu stqarrija li ma tasalx biex kulħadd jibqa’ f’postu u jaħseb għal rasu u jekk ikollu bżonn xi ħaġa jċempel lill-aġenzija Appoġġ, jekk dejjem is-sett tat-telefon ma jiklux xi ħadd.

Malta dejjem kienet nobbli mal-pajjiżi mhux żviluppati statalment. Speċjalment ma’ dawk li deħlin fil-Eurovision Song Contest ta’ din is-sena.

Hawnhekk bħal Malta kien hawn l-elezzjoni presidenzjali tal-kamra. Il-kandidati kienu tnejn: Kenjan Kibaki tat-tribù kikuyu, l-ikbar waħda fil-Kenya, li kien qiegħed jikkontesta għat-tieni mandat u Raila Odinga tat-tribù luo li jirrapreżenta it-tribùjiet l-oħrajn.

L-elezzjonijiet kienu tribali ħafna. Flok distretti, tribùjiet. Biex ħadd ma jkun diskriminat b’xi liġi elettorali approvata miż-żewġ naħat.

Il-kikuyu jinsabu fil-gvern u ma jridux jitilqu għall-ebda raġuni. It-tribùjiet l-oħra huma mxebbgħin li jkunu kastigati minn politika li toffri l-maġġoranza tal-finanzjamenti liż-żoni tal-kikuyu u vvutaw lil Raila.

Hawnhekk min għandu l-poter, qiegħed ma’ liema tribù qiegħed, il-poter iħaddnuh bis-sod, u ma jitilquh qatt.

It-tensjoni u l-istennija għar-riżultat ta’ l-elezzjoni kienet tinħass ħafna. Ankè lejlet l-elezzjonijiet, fejn suppost kien hemm is-silenzju tal-ġurnalisti, kien hemm xi ġurnalist li bagħat faxes minn taħt biex jippromwovi t-tribù tiegħu.

Raila kien minn fuq, imma f’daqqa waħda l-kummissjoni elettorali, li xogħolha kien li tagħti r-riżultati ta’ l-elezzjoni, waqfet ħesrem milli tagħmel dan u keċċew il-barra l-ġurnalisti kollha li kellhom permess ikunu fis-sala waqt l-għadd tal-voti.

B’hekk ħadd ma seta jkun jaf min kien il-kandidat rebbieħ. Il-jum ta’ wara l-istazzjonijiet oskuraw it-televiżjonijiet tagħna, ħlief dak ta’ l-iStat.

Il-forza militari marru fil-pjazza u fit-triqat biex jagħmlu l-kontrolli tagħhom, u mill-uniku stazzjon disponibbli; l-kummissjoni elettorali qalet li l-kandidat rebbieħ huwa Kibaki.

Probabbli rebaħ Raila fil-voti imma Kibaki kellu iżjed siġġijiet.

U wara ftit minuti ħalef bħala president tal-kamra, f’ċerimonja ta’ malajr. Immedjatament infaqgħu reazzjonijiet ta’ vjolenza li kienu prevedibbli.

Fil-fatt kien kolp ta’ stat.

Qed niktbilkom mill-belt ta’ Nakuru. Hawnhekk kollox sew jidher: imma sa issa.

Ħafna ħwienet huma magħluqin u l-ftit li huma miftuħin għandhom is-shutters imniżżlin. It-toroq huma baħħ. Il-belt hija kwieta għax hawnhekk il-maġġoranza hija kikuyu u mhux ħa jkunu żgur huma li jipprotestaw għar-riżultati mbagħbsa ta’ l-elezzjoni.

Mietu xi nies. F’ċertu żoni l-vjaġġ huwa perikoluż. Il-gvern għalaq il-pompa tal-petrol imma tad-diesel ħalliha għaddeja ħabba kwistjonijiet ambjentali.

Fiż-żoni ta’ maġġoranza luo, l-inkwiet huwa enormi. Imma huma żoni l-bogħod minn tagħna. Il-Kenya bħalissa jinsab f’idejn organizazzjonijiet kriminali.

Il-pulizija kollha ġiet ordnata biex tipproteġi ż-żoni fejn hemm Kibaki biss u l-kriminali jistgħu jagħmlu li jridu.

Dal-lejl fid-djar taż-żona tiegħi ġew imqassma ħafna karti. Wegħduna li d-dar se tinħaraq jekk ma nħallsux il-kerha li hija daqsxejn għolja.

Jekk ma ktibtilkomx qabel jew ma bgħattilkomx SMS huwa għax spiċċawli l-flus. U meta mort biex nixtri card ġdida tal-ħwienet talbuni sebgħa fil-mija aktar milli tiswa u f’buti ma kellix dawk il-flus.

Fil-ġenn u t-tawħid kulħadd japprofitta. Tabilħaqq, kif intom sejrin bil-euro?

L-istazzjonijiet televiżivi qed jitrasmettu ħafna aħbarijiet imma bl-aġenda tat-tribù.

Nitlobkom sinċerament talba għal Kenya. Lil dawk li ġejjin bl-AirMalta, nitlobhom biex qabel ma jiġu, jagħmlu ġabra ta’ flus biex tintwera solidarjetà għal dan il-pajjiż.

Jiena mhux se naqta’ qalbi. Jiena lest li noħroġ għonqi u nitlef rasi għal dawn in-nies bżonnjużi.

Sliem u saħħa,

missjunarju mill-Kenya.

(ismi mhux se niktbu minnħabba raġunijiet ta’ sigurtà) ”


Biex tikteb kumment dwar l-artiklu, “It-Tramuntana fil-Kenya": għafas hawn.