Ekonomija xokkanti

Fil-milied m’għadnix nirċievi kejkijiet u ċikkulatini biex nirqaq. M’għadhomx jixtruli ħwejjeġ extra large. Sa sena ilu, kienu jtuni kupun ta’ Lm5 biex nixtri qalziet jiswa Lm8. Dis-sena kienet l-agħar sena. Bħala rigal tal-milied tawni indirizz ta’ web-site. L-anqas bżonn ta’ kelma ċavetta biex nidħol.

Biex nixtri il-ktieb: The Shock Doctrine: The Rise of Disaster Capitalism.

Ekonomija Xokkanti: It-Telgħa tal-Kapitaliżmu Diżastruż.

Ekonomija xokkanti tassew. Dan il-ktieb ġie jiswini 12 –il ċenteżmu ta’ l-ewro iżjed milli suppost. Jiswa 16.71 euros mill-Amazon iżda l-calculator bla flus tal-BOV qaltli li dak il-ktieb jiswa 16.82 euros. Ikolli nbaxxi rasi.

L-għan ta’ dan il-ktieb ma rnexxix. Flok irqaqt bix-xokk, iżjed żidt fil-kilogrammi. Kont naħseb li mhu se nistagħġeb b’xejn iżjed: kuljum naqra għal liema ferneżija djabolika kapaċi jasal min għandu l-poteri tad-dinja f’idejh.

Imma milli jidher dan ma kienx biżżejjed għal pressjoni u kolesterol. Naomi Klein, l-awtriċi ta’ The Shock Doctrine, kienet kapaċi ssib informazzjoni li ħadd qabel ma kien sab: l-anqas sandrovella.org! Kienet kapaċi tifforma il-pjan djaboliku numru elfejn u tmienja.

Mhux biex niftaħar imma minn dejjem ħsibt ħażin fuq Friedman u ċ-Chicago Boys imma qatt ma ħsibt li għandhom idejhom tqal bit-tiċpis tad-demm.

L-ewwel kapitlu swieli żewġ pizza margherita f’nifs wieħed u erba’ ġbejniet tal-bżar mhux pastorizzati u l-anqas awtorizzati. L-ewwel kapitlu jitkellem dwar esperimenti ta’ ċertu stil raffinat ta’ tortura psikoloġika pjanati minn tobba u xjenzati biex jagħtu daqqa ta’ id lill-gvernijiet li huma interessati ħafna. Minn hemm, sar eżami komplut u tal-waħx tal-kankru ekonomiku dinji magħruf bħala Skola ta’ Chicago, dik il-filosofija ekonomika feroċi li taffettwa lil Malta u mhux biss.


It-tbatija, il-weġgħat u l-mejtin li produċiet din il-filosofija huma mxerrdin mad-dinja kollha, mill-Polonja għar-Russja, mill-Arġentina sa l-Ingilterra sa l-Iraq. Teorija li tbassar mhux biss diżastri naturali, ekonomiċi, politiċi fuq il-popli taħt xokk; iżda jipprogrammaw id-diżastru fuq mejda mat-tè u l-biskuttini jekk dawn id-diżastri ma sarux waħidhom.

Ħadd ma jeħlisha: kif Naomi turi bl-intervisti lejn nies li kellhom x’jaqsmu direttament billi turi evidenzi konkreti.

Id-dilettanti tal-politika f’Malta huma kompliċi għat-tidwir ta’ kliem. Sant kompliċi fit-trattat u kostituzzjoni u ratifika. Gonzi taxxa jsejħilha miżura, u konsulent isejjaħlu speċjali. Harry l-illegali jsejjaħlu irregolari, u Lowell jgħid li hu razzjali.

Wara li taqraw dan il-ktieb hemm ħafna kliem li se tisimgħu b’mod differenti. “Privatizazzjoni”, “Kompettitività”, “Flessibilità”, “Liberaliżmu”, “Libertà”, “Demokrazija”.....

Jekk tridu tkunu tafu l-għaliex mhu qed isir xejn dwar id-diżastri tal-futur (l-għoli taż-żejt, il-klima globali, l-ekonomija) dan il-ktieb huwa tajjeb għalik. Jekk ma tridx tkun taf l-għaliex mhu qiegħed isir xejn tista’ dejjem tisma’ l-leħen tal-verità u ġieħ is-sewwa.

Peppi Azzopardi u l-ġeografija kellhom raġun: Malta hija parti mid-dinja. Li nesa jgħid hu li dak li jiġri fid-dinja jaffettwa lil Malta imma mhux lill-ġurnaliżmu Malti. Fil-qasam internazzjonali l-ġurnaliżmu Malti wasal sa Arafat, Twin Towers, Brussell, l-arkivji tal-PBS, Britney Spears xagħra mqaxxar, Anġelik u r-rużarju, l-Olanda għad-divertiment sesswali u l-Ingilterra għat-tfittxija ta’ Madeleine McCann.

Il-futur ta’ dawn il-katastrofi jista’ jkollhom effett fuq ażjendi u fabbriki sodi, fuq pajjiż sod u fuq par idejn sodi.

Dan il-ktieb stordini. Tixtrux rigali lilkom infuskom għax tħossukom iżjed waħidkom u b’dan il-ktieb tħossukom iżjed.

Tkun Malti jfisser ukoll tkun waħdek.


Biex tikteb kumment dwar l-artiklu, “Ekonomija xokkanti": għafas hawn.