Awguri mitt darba!

Il-prezz internazzjonali taż-żejt laħaq il-$100 barmil.

Il-prim ministru ta’ Malta Lawrence Gonzi għandu sfida kbira quddiemu kif dejjem saħaq: il-prezz taż-żejt. Sfida mportanti u diffiċli ħafna, li skond hu, il-poplu Malti qed jerfa’ b’responsabbiltà u l-gvern qed jaffronta din l-isfida tajjeb ħafna.

Mill-kamra l-oħra, il-kap ta’ l-oppożizzjoni Alfred Sant għandu sfida akbar: li jnaqqas is-surcharge b’50 fil-mija ġaladarba jitla’ fil-gvern. Dik hija l-wegħda li għamel malli jitla’ fil-gvern peress li tal-VAT hija skaduta.

Il-prim ministru ta’ Malta Lawrence Gonzi qabel ma wera solidarjetà ma’ Fredu, qal li Fredu ma jafx x’inhuwa jgħid li jnaqqas is-surcharge bin-nofs minnħabba l-għoli bla waqfien tal-bramel.

Minn naħa l-oħra tad-dinja, jitkellem il-president il-ġdid ta’ l-OPEC ( Organisation of the Petrolium Exploring Countries ), Chakib Khelil li huwa il-ministru responsabbli mill-enerġija fl-Alġerija.

Dan qal li l-prezz ta’ 100 dollaru l-barmil mhuwiex neċessarjament prezz għoli u li xorta jibqa’ taħt ir-rekord ta’ l-1980 li kien l-istess bħal 102 jew 110 dollaru tal-lum.

Id-dollaru nieżel imma minn għaxar snin ilu, qiegħed jitla’ fuq: meta l-barmil ikun 200 dollaru, il-rekord ta’ l-1980 se jkun 230 dollaru u l-istorja tibqa’ sejra. Sal-bieraħ kulħadd kien qiegħed jagħjat li l-prezz se jinżel. F’daqqa waħda sar U-turn psikoloġiku tal-100 dollaru bħala xi ħaġa normali.

Il-kelma nteressanti tal-ministru Alġerin hija dik il-kelma: “neċessarjament”. Xi tfisser? Jista’ jkun messaġġ lill-amerikani li bil-barmil għal 100 dollaru il-bilanċ diżastruż taż-żejt fl-Amerika huwa ta’ 573 eluf ta’ miljuni ta’ dollaru fis-sena? Li sakemm ikun hemm xi ħadd (OPEC) li jsellifhom il-flus (Żejt) jista’ jkun ammont sostenibbli?

Ħmistax il-ġurnata oħra fl-Amerika se jkun hemm skossa ekonomika li se taffettwa wkoll lill-Ewropa. M’għandi l-ebda link din id-darba. Din ġibtha mill-moħħ tuba u ġidra li għandi: meta ż-żejt jilħaq dak l-ammont, l-Amerika għandha bżonn toħloq kontro-bilanċ ta’ l-effett u tonfoq eluf ta’ miljuni ta’ dollari.

Iż-żejt jitla’…id-dollaru jinżel….il-euro tissaħħaħ u l-esportazzjonijiet Ewropej jonqsu.

Ninsabu fit-tarf ta’ diżastru ekonomiku dinji u Gonzi jilqa’ l-isfidi qisu ħassa minn fuq dar il-poplu u Sant inaqqas il-kont tad-dawl bin-nofs minn fuq dar il-poplu.

L-unika soluzzjoni għal Malta hija li hemm bżonn ninqatgħu u nagħtu parir lill-unjoni ewropea biex jinqatgħu mill-imperu amerikan. Il-flus investiti fiż-żejt għandhom jiġu nvestiti fi produzzjonijiet ta’ enerġiji alternattivi biex niddependu anqas miż-żejt. Aħjar sagrifiċċju ekonomiku issa milli traġedja l-quddiem!

Iva bil-ħaqq. Malta ma tistax titkellem. Għandha ftit siġġijiet. Pajjiż żgħir. Ma tistax tagħti pariri u ma tistgħax tagħmel li trid f’pajjiżha: ħlief għall-kaċċa.

Malta ewropea fir-riklami biss!

Xi darba, forsi, il-poplu se jistenbaħ li l-affarijiet mhumiex sejrin kif qed jgħidulhom il-politiċi u se jibdew jinteressaw ruħhom. Jekk ikun tard wisq: se jibdew jibżgħu.


Biex tikteb kumment dwar l-artiklu, “Awugri mitt darba!": għafas hawn.