Il-Blogosfera Maltija

(ritratt) Jacques Renè Zammit, blogger iħokk rasu jgħodd il-kinnie u t-twistees li għandu jħallas. Dan il-blog għandu l-privileġġ jgħid li permezz tiegħu: Għawdxi ħallas il-kont ta’ 10 bloggers u l-qarrejja tagħhom u l-agħar li: spiċċa jħallas il-kont tiegħu wkoll.

Is-Sibt, 22 ta’ Diċembru 2007, kif miftiehem, il-Bloggers Maltin iltaqgħu. Attendew xi qarrejja u ħbieb ukoll.

Il-bloggers preżenti : -

Wendy – La Delirante
- minn El Salvador u tgħix Malta.

David Cuschieri
- accountant ġo kumpanija ta’ Insurance.

Jean Paul Galea
- student mistħi fil-Junior College. (mistħi bħala persuna u mhux jistħi għax imur il-Junior College)

Rebecca
- mara friska miż-żwieġ.

Claire Bonello
- l-avukatessa tal-futur. Diġà qegħda tipprepara l-awtobiografija.

Rupert Cefai
- pittur modest li l-isbaħ pittura pinġiha f’għajnejn il-mara tiegħu preżenti għall-laqgħa. Il-pitturi ta’ Rupert huma ħafna irħas minn ta’ Norman Lowell.

Jean Paul Borġ
- bankier li se jagħmel programm ma’ Josephine Zammit Cordina.

Vlad Oxford Transilvania
- ġurnalist li ma jeżerċitax Malta. Ħabib kbir u ntimu ta’ Anthony Licari.

Justin
- li l-paġna tal-blog tiegħu abbandunatu.

Jacques Renè Zammit
- li għadni ma qbadtx art x’xogħol jagħmel. Però jaħdem żgur għax ħallasli kinnie minn ġol-ħġieġ u pakkett twistees mill-oriġinali u mhux less cheese; less twistees.

u ovvjament: jiena, kif jixhed ir-ritratt meħud ċar kristall ħafna mill-camera professjonali ta’ Jacques.

Bloggers minn ambjenti differenti. Bloggers b’fehmiet u ideat differenti. Bloggers bla ebda linja editorjali.

L-informazzjoni hija bbażata fuq il-fiduċja.

Kull min għandu fama dgħajfa jista’ jgħid li jrid għax qatt mhu se jiġi emmnut. Għalhekk Pullicino u Francino m'attendewx il-laqgħa tal-bloggers Maltin. Apparti li s-Sibt fil-għaxija, il-fotografi ma jaħdmux.

Jista’ jikteb li jrid fuq il-gazzetti u jidher kemm jiflaħ fuq it-televiżjoni, inutli: mhux se jiġi emmnut.

Jista’ jkun prim ministru ta’ malta, jistgħu jieħdu sehem f’żewġ programmi fl-istess ħin bħal San Ġorġ Preca: xorta ma jiġux emmnuti.

F’Malta hawn kriżi kbira ta’ kredibilità.

Dak li huwa inkredibbli, il-media tagħmlu kredibbli għax huma posseduti minn gruppi ekonomiċi biex il-gruppi ekonomiċi jagħmlu aħjar in-negozji tagħhom.

Il-ġurnalisti għandhom familja. Iridu jmantnuha. B’hekk jimxu mar-rieda ta’ l-editur u mhux tal-qarrej.

Il-blogger huwa ġurnalist li jikteb fuq l-internet mingħajr m’għandu editur. Għandu biss il-qarrej u għandu jwieġeb lilu biss.

Qed jipprovaw ibiddlu wkoll is-sens vera tal-blog. L-ewwel ma tħajjret kienet it-Times of Malta u dritt warajha l-gazzetta tax-xarabank: Kif? (paġna 8).

Il-blog ta’ vera m’għandux ċensura. Il-blog huwa kultura li t-televiżjoni llum m’għandix.

It-televiżjoni saret żibel ta’ programmi matul il-ġurnata kollha u bil-lejl: ir-ripetizzjonijiet! Qisu t-trakk għadda darbtejn.

Fil-post fejn saret il-laqgħa tal-bloggers it-televiżjoni kienet fuq il-Bonaci Sorpriża. Dawk li ddeċidew li jieħdu kopja riduttiva ta’ Tista’ Tkun Int. Għandhom ħaġa bla distinzjoni: fil-passat tnejjku bi skoss nies kemm felħu imma ara biss min jitnejjek bihom. Għax jitilfu l-gruppi ekonomiċi!

Il-laqgħa tal-bloggers tat-22 ta’ Diċembru kellha l-kunċett tal-Creative Commons, li teħles l-informazzjoni:

Jekk jiena għandi ewro u inti għandek ewro u npartuhom: fl-aħħar se jkollna ewro kull wieħed. Imma jekk jiena għandi idea u inti għandek idea oħra u npartuhom: fl-aħħar se jkollna żewġ ideat kull wieħed li minnhom kapaċi toħroġ it-tielet idea.

L-informazzjoni Maltija għandha bżonn lil bloggers daqskemm Gonzi għandu bżonn lil Dalli u daqskemm Sant għandu bżonn jagħlaq ħalqu u daqskemm Peppi għandu bżonn il-PBS u daqskemm il-PBS għandha bżonn tneħħi l-aerials mill-bjut tal-poplu biex tiġi privatizzata "uffiċċjalment" u daqskemm il-gvern għandu bżonn iżid il-fibbra ottika minn but il-poplu u jpaxxi ċertu kumpaniji ta' l-internet u daqskemm il-president għandu bżonn jibgħat lill-mara tiġbor il-ħnieżer biex jinħafru d-dnubiet.

L-opportunità għall-informazzjoni Maltija tinsab f’idejn il-bloggers.

Tħalluhomx jinvadu dan l-ispazju wkoll!