Sesswoloġija Maltija

Jiena nirċievi u jiena nippubblika.

“ Iż-żgħażagħ Maltin għandhom l-inqas rata ta’ sess bla riskji fl-Ewropa.

Primarjament, dan għaliex ħafna ma jifhmux l-importanza ta’ sess bla riskji minn użu ta’ kontraċettivi bħal ma huma l-condoms.

Sess bla riskji mhux biss kontraċettiv; iżda tinkludi wkoll protezzjoni mill-STI (infezzjoni trasmessa sesswalment), li huma infezzjonijiet serji li jagħtu konsegwenza ta’ ħafna tbatija. Ftit mill-konsegwenzi ta’ l-STI jikkawżaw mewt, eżempju: AIDS.

Il-condoms jipprovdu kontraċezzjoni u protezzjoni kontra ħafna mill-STIs, li tinkludi l-AIDS. Meta jiġu użati korrettament, l-effett condoms huwa ta’ 98%.

Il-condoms għandhom jintużaw kemm mill-eterosesswali u mill-omosesswali, kemm waqt sess minn quddiem jew minn wara, u indifferenti jekk l-interessati jafdawx lil xulxin jew inqas.

Petizzjoni hija bżonnjuża għalkemm ħafna tentattivi tal-passat għad-daħla ta’ magna tal-condoms fl-Università ta’ Malta rat ħafna reżistenzi.

Dan il-fattur qiegħed jagħti iżjed lok għall-inqas rata ta’ sess bla riskji madwar iż-żgħażagħ Maltin.

Attwalment, fl-Universita’ ta’ Malta ma hemmx magni tal-condoms.

Il-condoms għandhom ikunu aċċessibbli għall-istudenti ta’ l-Università ta’ Malta minn faċilità ta’ magna tal-condom ġo l-Università ta’ Malta.

Biex tiffirma l-petizzjoni għafas hawn. ”



Nerġa’ nirċievi u nerġa’ nippubblika.

“ Sliem għalikom,
L-Erbgħa, 14 ta’ Novembru 2007, se ssir reġistrazzjoni ta’ programm dwar is-sess u l-ossessjonijiet tiegħu (fetixis). Qed infittxu nies biex jieħdu sehem fil-programm li jkunu moħħhom miftuħ. Qed infittxu l-iżjed, nies li jħossu li s-sess m’għandux jiġi prattikat faċilment...u li dan ifisser imħabba biss.

Jekk jogħġbok ibgħat e-mail fuq claire@we.com.mt .

Grazzi.

Claire Preca Taroum
Produttriċi
Xarabank ”


Il-problema tal-parkeġġ fl-università ta' Malta ġiet solvuta. L-istudent issa għandu spazju fejn imur ma’ l-istudenta, fil-karozza tiegħu, u jipprova jagħmel dak li ilu ma jagħmel minn meta l-lecturers okkupaw l-ispazji tagħhom. Din kienet inġusta għax il-lecturers kellhom l-awli biex jaħxu (il-futur ta’) l-istudenti.

L-istudent li jkun ma’ l-istudenta fil-karozza tiegħu fil-parkeġġ li tant xtaq, jiskopri li jonqos xi ħaġa fil-campus. Ma jistax jibda l-operat tiegħu għax fl-università ma hemmx condom machine u għand spiżerija ma jistax imur għax l-istudenta hija l-ġara ta’ tifla ta’ spiżjar u l-kelma tiġri malajr iżjed mill-ispermatozojdes.

Li jonqsu l-istudent mhuwiex condom machine. Iżda edukazzjoni. Edukazzjoni mhux kif, fejn u fi xi ħin iddaħħlu imma edukazzjoni fejn tfehmu li l-

AIDS huwa virus ivvintat.

Hija l-kura li toqtol u mhux il-marda!
“Aħna nafu li tiżbalja huwa uman, iżda t-teżi ta’ l-HIV-AIDS huwa żball makroskopiku. Ngħajjatha ċara u tonda biex navża lin-nies.”
- Kary B. Mullis, Premju Nobel għall-kimika fl-1993 għall-iskoperta tal-PCS (Polymerase Chain Reaction)

Il-condoms fl-iskejjel u fl-università jmissu ma’ l-interessi politiċi li ma jridux imissu lil dak li ppumpaw fil-media bħala isqof żagħżugħ. Fil-kattoliċissima Irlanda hemm condom machine f’kull klassi! Ma tista’ tgħid qatt x’jista’ jiġri!

Fl-università hemm nies li jistudjaw biex isiru ġinekoloġi, biologi li jilgħabu bid-DNA aħjar kif meta Jason jilgħab bi Fredu. Fl-Istorja jiġu ndagati l-massakri ta’ l-aħħar seklu. Magna tal-condoms tqajjem skandlu!

Il-magna tal-condoms qegħda tinżamm mill-kurja! Probabbli jiġu bżonnha iżjed mill-istudenti.

Minn għada se nibda nittraffika l-condoms fl-università. Immur nixtri condoms lira ( € 2.33ċ ) u nbiegħhom minn taħt: ħames liri u sitta u sebgħin ċenteżmu ( € 13.42ċ ) .

L-unika virus li hemm fis-sesswoloġija Maltija, li mill-universita’ ttieħed fit-television. Xarabank se jagħmel programm riċiklat iżda ġdid fuq is-sess, u dan se jiġi reġistrat xahar u ftit jiem qabel il-verġni li qatt m’għamlet sess weldet is-salvatur tad-dinja. L-Iraq huwa pjaneta ieħor.

Is-sess f’Malta m’għandu l-ebda riskju. Iżjed jiġi diskuss milli attwat!

Min jifhem fis-sess: jagħmlu, ipejjep sigarett u jagħlaq ħalqu.

Jiena ma npejjipx.

Biex tiffirma l-petizzjoni u jiġu ntrodotti magni tal-condoms fl-Università ta’ Malta, għafas hawn.

Biex tieħu sehem f’Xarabank dwar il-programm dwar is-sess, ibgħat e-mail fuq l-indirizz: claire@we.com.mt .