Rajt l-iskjavitù ma tinbidilx ( 2 )

( It-tieni parti )
Wasal il-mument li, jekk trid, l-internet ma tużahx biss għall-porn u tuża l-internet biex tibgħatli l-esperjenzi tiegħek bl-e-mail .

Minn għoxrin sena ‘l hawn l-iskjav modern jilbes l-ingrivata, jgħix taħt saqaf tal-mirja bl-apparat ta’ l-arja kundizzjonata. L-iskjav modern kellu u għad għandu l-kumditajiet kollha biex ikun skjav 360 grad ċelsjus. Però issa għandu l-problemi:

1. ix-xogħol żdiedlu u l-paga u l-job description (jekk għandu wieħed) baqgħu l-istess

2. il-paga baqgħet l-istess u l-prezzijiet tal-prodotti u l-manutenzjoni tal-kumdità għolew

3. il-ftehim kollettivi jiġu ffirmati u njorati miż-żewġ naħat


Il-problema ta’ l-iskjav modern hija li m’għandux min jirrapreżentah. (ara l-ewwel parti) U meta b’xi mod iħossu rappreżentat huwa sitt xhur qabel tkun ġejja l-elezzjoni ġenerali.

L-iskjav modern hemm bżonn li javvanza ruħu u jibda jnaqqas mill-iskjavitù tiegħu u jibda billi jirrapreżenta lilu nnifsu u mhux taparsi rappreżentat minn ħaddieħor.

Mod li jirrapreżenta lilu nnifsu huma l-vot, jixtri dak li verament għandu bżonn, ma jonfoqx ċenteżmu żejjed li tinkludi ma jinvestix flusu fl-azzjonijiet tal-banek u jiminimalizza l-konsum tiegħu sa kemm hu possibbli. L-unika tama biex inaqqas l-iskjavitù tiegħu u jifdallu l-flus fil-but.

Aħna n-nies privileġġjati li għandna karozza, air-condition f’kull kamra u nsibu ċ-ċikkulata favorita tagħna fl-ixkaffa tas-supermarket dan ifisser li hemm skjavi oħrajn li qed jaħdmu għalina. Jaħdmu sigħat iżjed minnha, pagi iżjed baxxi u sfruttament galore. Però kuntenti li jieħdu biċċa ħobż u platt soppa.

Il-politiċi eletti ta’ Malta huma privileġġjati li ma jużawx ix-xarabank. Li jibdew ix-xogħol tagħhom fl-10.00a.m. Ma’ kull laqgħa li jagħmlu jkollhom il-kafè u l-biskuttini u l-air-condition. Għandhom karozza sabiħa ħafna li huma qatt ma ħallsu għaliha u jħalluha mixgħula biex ikollhom l-air-condition preparat, isiefru 20 darba fil-ġimgħa, u jaħdmu biss sitt xhur kull ħames snin biex jibqgħu jagħmlu dan kollu. Dan ifisser li hemm skjavi oħrajn li qed jaħdmu għalihom. Jaħdmu sigħat iżjed minnhom, pagi iżjed baxxi u sfruttament galore. Però kuntenti li jkollhom l-pizza bil-ħut kull nhar ta' Sibt bil-lejl u mobile biex jibgħatu xi SMS biex jirbħu xi tapit.

Dawn l-iskjavi ta’ l-aħħar huma l-ħaddiema ta’ vera mfarrkin wara tmien sigħat xogħol kuljum u ma jistgħux ilaħħqu mal-ħajja. Il-poplu Malti huwa l-Afrika t’isfel tal-politiċi mtellgħin minnu.

Il-politiċi bħala ħaddiema għandhom privileġġ ikbar fuq il-ħaddiema l-oħra li tiswa’ iżjed minn limousine: m’għandhomx pressjoni u monitoring u attendance sheet mill-boss tagħhom. Għax il-boss dejjem rieqed u waqt li jkun rieqed xi kultant żaqqu tgerger, it-tgergir iboss minn sormu, u mar-riħ tevapora.

Il-boss tal-politiċi huwa l-poplu.

L-introduzzjoni tal-karta l-bluna lill-immigranti regolarizzati se tkun skjavitù diretta mingħajr il-bżonn tal-Malti bħala intermedjarju. Il-gvern se jneħħi l-aġenti ta’ l-iskjavi.

Hemm iżjed opportunità li l-Malti jispiċċa bla xogħol u jieħu ftit flus mis-servizzji soċjali provduti mit-taxxi ta’ l-immigrant flok viċe-versa.

Iż-żieda fil-paga lejn it-tobba huwa eżempju ċar li l-imħuħ ta’ Malta qegħdin idabbru rashom. Ma tagħmilx sens li jintefqu ħafna flus u investimenti fi student u jispiċċa jservi c-chips sa nofs il-lejl u jaħsel l-art tal-ħanut sas-2.00a.m.

L-iskjavitù hija njoranza. Li tkun rappreżentat mill-partiti l-kbar attwali hija njoranza għax qiegħed tiġi njorat kontinwament.

Wara għoxrin sena sal-lum li l-partit nazzjonalista jitnejjek bin-nies f'wiċċhom, hija njoranza li n-nies jibqgħu ixejru l-bnadar. Mhux għax il-partitarji huma njoranti imma għax qed jiġu njorati.

Wara għaxar snin sal-lum l-unika pjan li għandu l-partit laburista huwa li jirbaħ l-elezzjoni. Il-programm elettorali tal-partit laburista jagħlaq fl-aħħar jum taċ-ċelebrazzjonijiet tar-rebħa, bħalma l-programm elettorali fl-aħħar rebħa tal-partit nazzjonalista għalaq meta Fenech Adami ffirma fuq il-ktieb ta’ l-unjoni ewropea.

Il-partiti ġodda li qed jitwieldu bħal l-alleanza nazzjonali u viva malta għandhom xi ħaġa komuni mal-partiti l-kbar. M’għandhomx l-ideat ċari ta xi jridu u kif se jaslu għal dak li ma jafux xi jridu.

L-alternattiva demokratika għadhom qed jipprovaw iħaddmu l-ultrasound.

Pero’ jeżisti politiku wieħed. Politiku tajjeb ħafna u jrid ħaġa waħda: Id-Dinjità. Politiku li għadu ma jafx li huwa politiku:

IL-POPLU

Beppe Grillo, fl-Italja, ġabar sensiela ta’ ittri mingħand ħaddiema li jonfqu l-paga qabel ma jarawha; mingħand studenti mimlijin u mkissrin bix-xogħol ta’ l-iskola li ma jirriflettix fix-xogħol reali u dan ix-xogħol li studjaw ħafna għalih ma jsibuhx; u mingħand nisa ta’ rġiel li tilfu x-xogħol tagħhom jew obbligati jaħdmu fuq part-time biex meta jrid itihom daqqa ġo sormhom u jitfagħhom il-barra. Dan il-ktieb jitkellem ukoll fuq sitwazzjoni attwali ħafna f’Malta: l-isfruttament ta’ l-istudenti fl-apprentistat u overtime obbligatorju mhux imħallas, u jekk imħallas: intaxxat iżjed!

Dawn id-dokumenti, Grillo, ġabarhom fi ktieb wieħed bl-isem ta’ Schiavi Moderni u tah personalment lill-ministru nkarigat mix-xogħol u jurih is-sitwazzjoni eżatta kif inhi.

Jekk trid li dan il-ktieb joħroġ bil-Malti wkoll u jispiċċa f’idejn il-mexxejja tal-partiti u l-impjegati tiegħek, preferibilment qabel jum il-votazzjoni, ibgħat l-esperjenzi tiegħek fuq info@sandrovella.org.

Jekk ma tridx tibgħat l-esperjenza tiegħek, ibqa’ viżitatur ta’ dan is-sit, idħaq daħqa, u mur kompli saħħan saqajk fil-heater sakemm jinħela ż-żejt.

Irrappreżenta lilek innifsek.

informazzjoni:
Beppe Grillo jippreżenta l-ktieb Schiavi Moderni lill-ministru tax-xogħol.