Propaganda Narċiżista

Il-propaganda qed taħkimna f’kull settur ta’ ħajjitna: mill-industrija għall-kummerċ, mill-iskola għall-politika u issa wkoll fis-sanità.

Jiena rrid insir klijent tal-Mater Dei. Żidt il-ħalib u bdejt nieħdu skadut, żidt il-qali, żidt l-għaġin, qbadt is-sigaretti, bdejt nixrob l-inbid u nħallat mal-vodka u l-whiskey bla silġ. Provajt naqbad id-drogi imma ma sibt nixtri minn imkien u qaluli li Querioz m’għadux fil-pajjiż.

Inżajt b’żaqqi barra u ħriġt niġri fix-xita. Kien hemm żewġ nisa u malli rawni ħasshom ħazin. Imma jiena ma ġrali xejn. Minn meta nfetaħ il-Mater Dei ma nista’ nimrad b’xej’.

Dawk il-billboards għamlu l-ġisem tiegħi ottimist. Kien hemm bniedem qabel ma daħal għall-operazzjoni tawh aperitiv u ftit epitajżers biex ifieq mill-epitajtes.

Ankì l-ilbiesi ta’ l-infermiera tal-Mater Dei huma ffirmati minn Valentino eżatt qabel ma rtira. L-ilbiesi tat-tobba se jkollhom ukoll irtokk ta’ Quentin Tarantino għat-transfużjoni tad-demm.

It-trabi se jitwieldu bil-potti ma’ sormhom u bl-ingravata ta’ l-iskola bil-biro ta’ l-indipendenza.

Ma nistax nifhem għaliex qegħda ssir din il-propaganda qawwija dwar il-Mater Dei. Il-propaganda se tiġi tiswa’ iżjed mill-isptar.

La l-isptar huwa tagħna għaliex din il-propaganda kollha ta’ xi ħaġa li hija tagħna? Ma’ min qed niftaħħru? Lil min irridu nbiegħuh l-isptar tagħna? La darba, darbtejn, tlieta u mija, il-poplu ħallas miljuni ta’ liri fuq sptar, għaliex irid iħallas eluf iżjed fuq propaganda għalih ta’ dak li se juża hu stess?!

Din hija s-sistema li kienu jużaw in-nobbli li ma kellhomx problemi ta’ flus. Jixtru libsa ġdida u biex il-libsa juruha fil-festi tan-nobbli, mal-libsa kienu jixtru l-isbaħ kullani tad-djamanti u tintesa’ l-libsa.

Almenu l-paroli fil-vojt tal-president meta kien għadu fuq skala ħamsa ma kinux jiswew flus. Kien iwiegħed u ma jsir xejn u flus ma jintefqux. Kienu jintefqu biss fuq dak li ma kienx iwiegħed.

Il-wegħdi li Gonzi mhux se jżomm, għax għalih l-importanti mhux dak li jgħid imma dak li jagħmel (u jiftaħar meta jgħidha), iwegħdhom bil-leaflets u billboards u bi flusna.

Il-Fredu miskin ma jistax jagħmel propagandi. Għax la għandu flus u l-anqas ideat. La għandu flus tal-poplu u l-anqas għandu idea ta’ poplu. L-aħħar idea li kellu huwa li l-poplu kien kontra l-unjoni ewropea u favur it-trattat tagħha.

Il-billboards u n-nies fotografati fil-Mater Dei ma jirriflettux ir-realtà. Dan huwa kollu gideb tal-gvern. Irrid ngħix fir-realtà, tkun xi tkun!

Ir-rieda, l-għaraq, l-indinjazzjoni u l-futur ippropagandajnih b’ħafna ħara, li huma dawk il-ħobż tagħna ta’ kuljum quddiem gazzetti bla preżentazzjoni, stazzjonijiet televiżivi bl-istampa sewda u aħbarijiet proċessati bħall-kimika fil-frott li jibgħatuk l-isptar.

Almenu nitfa’ kreattività fil-billboards la ħallast għalihom. Nixtieq niltaqa’ mad-direttur artistiku tal-billboards, li ħallast għalih ukoll, ħalli nipproponih fit-Teatru ta’ l-Iskala biex jaħsel il-lokijiet.

Jew kull min miss fil-Mater Dei qabduh il-mulliti f’idejh bir-roda li l-isptar jaqa’ fuqhom jew il-fotografu tħajjar mill-gvern u ried jeħles kollox ta’ malajr wara għoxrin sena torturi.

Għafas fuq l-ismijiet bil-karigi, biex iżżur il-billboards u ara l-virus tar-repetitive monotony strain injury li qabadhom f’idhom meta rifsu l-isptar Mater Dei dawn il-protagonisti tagħna:

Professur Albert Fenech, Chairman Dipartiment Servizzi tal-Qalb.
Professur Anġlu Psaila, Professur tal-Mediċina.
Lorraine Attard, Fiżjoterapista.
Vicky Gauci, Occupational Therapist/Service User.
Inġinier Karl Farrugia, Inġinier Biomediku.
Perit Martin Attard Montalto, Planning Manager.
Moira Grixti, ħaddiema tas-sena 2006 Sptar San Luqa.
Sandro Vella, pazjent b’ħafna paċenzja.

Biex tara l-billboards l-oħra għafas hawn.

Parti mill-budget 2008 il-Gonz qalilna li se jibda proġett pilota għall-breast screening nazzjonali. Bil-flus li ntefqu jmissu jagħmel pjan nazzjonali għal min għandu l-għasfur żgħir.


informazzjoni:

Mater Dei Hospital