L-effett kollaterali tal-banana

Skond studju ta’ sondaġġi, in-nies li jsoffru minn dipressjoni wara li jkunu kielu banana huwa li jħossuhom aħjar. Dan għal fatt li l-banana għandhom it-triptofanu, tip ta’ proteina li l-ġisem jitrasformaha f’serotonina, sustanza li tirrilassa u ttejjeb il-burdata u ġġagħlek tħossok iżjed ferħan.

Il-banana wkoll għandha l-kapaċità li trażżan il-ħruq ta’ l-istonku.

Il-Ġimgħa, 2 ta’ Novembru l-banana niżlitli ħażin u t-triptofanu trasforma f’uġigħ kbir ta’ żaqq u d-dipressjoni niżlet imma telgħet il-pressjoni u ħassejtni oppressat.

Il-Ġimgħa, 2 ta’ Novembru fil-programm ta’ Xarabank m’attendewx il-politiċi Maltin. Probabilment għax kienu qed jiċċelebraw il-festa tagħhom: jum il-mejtin.

Flok il-politiċi kien hemm il-banana. Il-banana sar każ nazzjonali. Każ li tagħmel programm sħiħ li jiswa’ eluf ta’ liri mill-but tal-poplu Malti. Kien hemm ukoll taz-ZOO. Kull ma kien jonqos il-kukku ta’ Frank Quattromani, zappuna f’idejn Peppi flok il-file ta' l-isponsors; joħroġ il-pipa mil-but; il-kollegament ma’ tal-YMCA maqfulin ġo gaġġa kien hemmhekk u r-razzett kien ikun komplut.

Illum m’għandix ħafna fuq x’hiex nagħmel satira. Nibża’ li nkun kaġun ta’ xi traġedja familjari u nkun kaġun li nżid l-income lil GO mill-pulses tat-telephone diretti lill-banana.

Fil-programm ġie deċiż li biex tagħmel satira fuq bniedem trid titolbu permess minn qabel.

Timmaġinawni lili nitlob permess lill-Papa? Taħsbu li se jtini l-benedizzjoni?

Sandro:”Hawn Benedittu nista’ niċċajta ftit fuqek?”
Benedittu:”Iva ibni tista’. Imma ssemmi xejn fuq it-templari ok?”
Sandro: “Hmmm...ok hux.”
Benedittu: “L-anqas fuq id-divorzju. Jew l-omosesswali. Le, hmmm...l-anqas fuq is-sigriet ta’ Fatima jew pedofiliji jew fuq il-flus lejn l-Afrika. Imma l-bqija tista’ ssemmi kollox. Żomm waħda. Issemmix kondoms u apoloġiji. Dejjem ikun imfaħħar.”


Timmaġinawni lili nitlob permess lil Gonzi?

Sandro: “Aw Wenz, nista’ nitnejjek ftit bik fuq il-blog tiegħi?”
Wenzu: ”Blog x’inhu?”
Sandro: ”Speċi ta’ forum. Bħal ma ftaħt inti fuq il-Budget fuq l-internet.”
Wenzu: ”Eh iva forum. Issa fhimtek. Dawk li kitbu l-ittri fuq il-gazzetti hux tal-forum żgħażagħ laburisti. Imma kif kullimkien jiddefsu. Ħa nċempel lil Natanjel.”



Il-permess ta’ Sant.

Sandro: ”Aw Fred. Nista’ niġbidlek saqajk fuq il-blog tiegħi?”
Fredu: ”Blog x’inhu?”
Sandro: ”Ara ħa ntik eżempju. Mela inti ppubblikajt ktieb sewwa? U għedt lill-qarrejja jixtru l-ktieb tiegħek u jħallu kumment wara li jaqrawh. U l-kumment iħalluh fuq l-internet.”
Fredu: ”Naqbel. Basta ma nkunx obbligat inwieġeb għall-kummenti. Jew almenu jtuni ċans naqra l-ktieb.”



Il-permess ta’ l-alternattiva.

Sandro: ”Hello. Nista’ nkellem lil Harry jekk jogħġbok?”
Cassola: ”Harry mhux hawn. Għadu qed ifittixli l-passaport. X’għandek bżonnu?”
Sandro: ”Nixtieq nitolbu permess jekk nistax nitnejjek bih fuq il-blog tiegħi.”
Cassola: ”Stenna wara l-kju sieħbi. L-immigranti għadhom ma waslux sax-xatt dal-għodu.”



Il-permess ta’ Norman Lowell.

Sandro: ”Hi Mr. Lowell. Can I use my blog to pull your leg please?”
Norman: ”Certamente! Sure! Dażgur! Ogni publicity is buon reklam.”
Sandro: ”Problema għalik jekk insemmi lil Hitler?”
Norman: ”No problem at all. Basta ma tassoċċjanix miegħu.”




Il-permess ta’ l-allenza nazzjonali:

Answering Machine: ”Għadek kemm qbadt mas-Saint James Hospital u l-HSBC. It-telefonata qegħda tiġi diverted. One moment please.
Hawnhekk il-partit ta’ l-alleanza nazzjonali. Partit kbir. Partit li se jikkontesta fid-distretti kollha fl-elezzjoni ġenerali li jmiss. Partit magħmul minn nies intelliġenti u kwalifikati. Minn nies li tista’ tafda fuqhom. BEEEEEP.”
Sandro: ”Sorry, wrong number.”



Il-permess ta’ viva malta:

Vuċi maskili: "Dan huwa messaġġ mill-Maltacom, sorry GO. Dan in-numru ma jeżistix. Jekk jogħġbok erġa’ prova iktar tard ħames snin oħra, forsi ssib lil xi ħadd, forsi."


Għandu raġun il-banana jgħid li se jitlef l-isponsors. Wara l-programm tax-Xarabank u r-riklamar qawwi bla ħlas li sar, l-isponsors tal-banana se jagħmlu transfer fil-Bomba.

Il-PBS ma tistax tieħu passi legali kontra l-banana. Meta tal-PBS marru għand l-avukati biex jirrapportaw lill-banana talli hedded li jfarrak il-PBS, l-avukati serrħu ras lill-bord tad-diretturi li l-banana mhu se jsib xejn x’ifarrak!

L-unika waħda li għandha dritt tiftaħ kawża hija l-Banana oriġinali! Li wara l-lum iddeċidiet li tbiddel isimha bħall-warda ta’ Shakespeare.

informazzjoni :
X.com.mt forum