Rajt l-iskjavitù ma tinbidilx ( 1 )

“Schiavi Moderni huwa ktieb ta’ vuċi ta’ ġenerazzjoni mitlufa. Ktieb ta’ xhieda. Fl-Italja għaddejja gwerra minn taħt kontra ż-żgħażagħ. Paga baxxa. Impjegati għal żmien limitat, ankè għall-week-end wieħed. Bla prospettivi. Jekk iż-żgħażagħ tagħna wara d-diploma, wara l-gradwazzjoni, jsiru skjavi taħt il-liġi, x’futur jista’ jkollha l-Italja?”

sors: www.beppegrillo.it

( L-ewwel parti )

F’Malta, inqalbet is-siegħa għal darb’oħra. Is-siegħa oriġinarjament kienet tinqaleb biex l-enerġija tiġi frankata u biex jintużaw sigħat tax-xogħol tas-sajf u sigħat tax-xogħol tax-xitwa. In-nofs ta’ nhari fis-sajf spiċċaw. Tinbidel is-siegħa imma hemm jibqgħu l-istess ħinijiet tax-xogħol li jdumu sena sħiħa.

Tinqaleb is-siegħa biex tiġi frankata l-enerġija u l-ħaddiem fis-sajf flok igawdi l-baħar jixgħel l-air-condition ta’ l-uffiċċju.

Fis-6.00a.m. il-Malti ma jibqax rieqed u jqum. Iqum mhux biex isemma’ leħnu imma jqum biex imur jaħdem. Il-Malti jqum u jmur jixtri l-ħobż frisk u jgħollilu l-prezz għax il-qamħ qed imur fil-biodiesel. Biex jiffranka l-flus fil-magna tal-karozza. Jipprepara l-ħobż għal break ta’ siegħa u fis-6.50a.m. jaqbad isuq għax-xogħol.

Isib it-triq mimlija karozzi. Xarabank idaħħnu. It-triq li għada kemm tinbena hija magħluqa jew it-triq li kellha titlesta’ sitt xhur ilu għada għaddejja bix-xogħolijiet u jeħel jew ikollu jaqbad triq oħra.

Taxis isuqu bl-addoċċ u vannijiet ta’ l-iskola jiġru biex ilaħħqu mal-ħinijiet ta’ l-istitut. Il-warden iwaqqaf lilu għax ċempillu l-boss fuq il-mobile biex jgħidlu li se jaqtgħalu mill-leave jew mill-paga.

Jasal għax-xogħol ħames minuti tard u l-ġurnata ma tidhirx raġġanti. Imur fuq l-iskrivanija tiegħu u jiftakar kemm kien jirribella meta kien żagħżugħ biex ikollu dritt għall-parkeġġ fl-Università. L-uniku dritt li kien kapaċi jiġġieled għalih.

Waslet is-siegħa t-twila tal-break. Il-ħobż sarlu żibel wara erba’ sigħat u nofs jaħdem u jiddeċiedi li jieħu ftit arja friska barra mix-xogħol u jixtri l-ħobż minn x’imkien ieħor. Sakemm ħareġ, iltaqa’ mal-karozzi u qagħad wara l-kju biex jixtri l-ħobż u dam 25 minuta sakemm kiel, 10 minuti biex kiel u xorob u 10 minuti oħra sakemm mar lura għax-xogħol. Jaf li qabillu jibqa’ fil-post tax-xogħol matul il-break imma ma riedx ipaxxi lill-imgħallem u jaħdem bla ma jitħallas għalkemm flusu spiċċaw fil-konsum tal-petrol sakemm mar jiekol biċċa ħobż u lura.

Jgħaddu t-tmien sigħat xogħol u s-siegħa break u jmur id-dar għajjien. Jasal id-dar 45 minuta wara li spiċċa mix-xogħol ħabba t-traffiku tal-karozzi. Imur jinħasel, jistrieħ, isajjar u jiekol. Siegħa u nofs oħra. Għandu erba’ sigħat għad-dispożizzjoni fejn jiddedikahom għal ħin liberu tiegħu però ftakar li jrid :

1. Iħallas id-dawl għax il-gvern jobbligah juża ż-żejt.

2. Iħallas il-kont tat-telephone għax biex jidħol fuq l-internet f’Malta hija diffiċli.

3. Iħallas il-cable/digital television biex jinforma ruħu għax biex tidħol fuq l-internet f’Malta hija diffiċli.

4. Iħallas ix-xirja globalizzata għax l-agrikoltura Maltija spiċċat f’appartamenti vojta.

5. Iħallas l-Income Tax għax il-VAT mhux biżżejjed.

F’dawk l-erba’ sigħat tal-ħin liberu jmur ifittex part-time u niltaqa’ miegħu jservini tazza ħalib f’kafetterija. U minn tmien sigħat allokati għal raqda u mistrieħ juża ħamsa minnhom.

Dan il-waiter universitarju skopra l-ilma sħun meta xewa jdejh u kisser platt u l-imgħallem part-time ġagħlu jħallas il-platt.

Dan il-waiter universitarju skopra li m’hu rappreżentat minn ħadd fuq l-ebda settur. La qabel imur għax-xogħol. La waqt ix-xogħol. Lanqas wara l-ħin tax-xogħol.

Dan il-waiter tgħallem ħafna suġġetti obbligatorji u kellu jpoġġi għall-eżamijiet tagħhom: Studji Ambjentali, Għarfien Reliġjuż, Xjenza Avvanzata u tgħallem ukoll suġġetti li kellu bżonn għas-sodisfazzjon ta’ ħajtu: Psikoloġija, Soċjoloġija u Filosofija. Kollox għaż-żeta. L-unika raġuni li ma telaqx minn Malta hija li għandu ommu marida minħabba l-istudji ambjentali.

Il-battalja lejn dawk li suppost jirrapreżentawna m’għandhiex tkun dwar in-nisa topless iżda dwar din l-iskjavitù moderna għax b’din l-iskjavitù: topless se jispiċċa kulħadd.

Irrakkonta l-esperjenza tiegħek (anonima u le) bħala ħaddiem jew student billi tibgħat e-mail fuq info@sandrovella.org .

Irrakkonta dwar il-paga. Dwar il-ħinijiet. Dwar il-flessibilità. Dwar dak li l-gvern mhux jaghti każ. Dwar id-drittijiet u r-rispett. Dwar il-paroli fil-vojt. Dwar ix-xogħol innifsu. Dwar iċ-ċertifikati tiegħek u fejn qed jiġu stmati eċċ. eċċ. eċċ.

Insejt ngħidilkom li dan il-waiter huwa miżżewweġ u ferħan ma' mara li tħobbu ħafna u li taħdem. Miżżewġin prattikament separati. Għajnejhom rari jiltaqgħu. Jiltaqgħu saqajhom kesħin meta jkunu fis-sodda.

Familji fis-sod!

Rajt l-iskjavitù ma tinbidilx ( It-tieni parti )