Il-millennium bug tad-demokrazija

Ġesù kien għamel partit. Il-partit ta’ l-appostli. L-istorja kulħadd jaf kif tispiċċa. Wieħed imsallab rasu ‘l fuq u l-viċi kap imsallab rasu l-isfel.

Il-partiti kienu jaħdmu xi darba, forsi. Il-partiti u l-forza tagħhom kienu ta’ xi ġid għar-riżultati li għandna llum, forsi. Ġorġ Borġ Olivier kellu partit ukoll, xi darba. Iltaqgħu minn wara daru, ġo daru, fil-11p.m., waqt l-aħbarijiet tan-NET u tajruh lil hemm. Duminku Mintoff ukoll kellu partit imma kien jagħmel kollox hu. Il-viċi kap ta’ Mintoff u x-xufier ta’ Mintoff kien jisimhom Mintoff. U r-riżultati nkissbu tassew.

Alfred Sant, meta kien għadu jismu Alfred Sant, ukoll prova jagħmel bħal Mintoff u jkun ix-xufier tiegħu nnifsu. Imma Mintoff kien għadu hemm preżenti!

Illum il-partiti ilhom 25 sena bil-pensjoni. Bil-pensjoni jiġifieri għamlu xogħolhom, nirringrazzjawhom però posthom huwa ġo bini li x’aktarx il-MEPA se twaqqa’ fuqhom.

Fil-laqgħat tal-partit laburista malti ma tarax żagħżugħ wieħed. Nies anzjani li flok iridu futur għall-uliedhom iridu jsalvaw l-istorja tal-passat tagħhom. Il-ftit żgħażagħ li hemm f’dan il-partit malti dejjem wara l-computer, bħali, jiktbu ittri lill-gazzetti b’eloġji lejn l-mlp u jtellgħu l-YouTubes favur il-Fredu nazzjonali u juruna l-anzjani ħerqana biex ir-rebħa tagħhom, xi darba terġa’ tkun. Il-laburisti meta jixtru l-qabar tagħhom, m’għadhomx jagħmlu ritratt tagħhom personali iżda ritratt tal-Fredu, flimkien ma’ maktur tal-labour flimkien mal-horn taċ-ċelebrazzjonijiet għal meta jasal il-mument.

Minn naħa l-oħra l-Gonz għandu ħafna żgħażagħ li jattendu l-meetings. Minn meta l-Gonz wiegħed breast screening nazzjonali bla flus, il-ġuvintur bi ħġarhom itellgħu nisa fuq spallejhom biex ikun jistgħu jmissu xi żejża u t-tfajliet ixejjru l-bnadar. L-unika żagħżugħ li għandhom fil-partit irnexxielhom b'xi mod jumiljawh.

L-unika ħaġa komuni bejn iż-żgħażagħ nazzjonalisti u laburisti hija li qed jieħdu ħsieb il-hi5 tal-politiċi favoriti tagħhom. ( http://votemangion.hi5.com - http://clydepuli.hi5.com ) Il-politiċi kull ma jonqoshom jagħmlu huwa ftit piercing maż-żokkra.

Kieku ma jeżistux il-partiti: George Abela u Lino Spiteri kienu jibqgħu jeżistu u Michael Falzon isib postu.

Kieku ma jeżistux il-partiti: Tony Abela jintbgħat jagħmel il-purċissjonijiet ħafi bil-ħġieġ fl-art quddiem is-suldati Rumani jbossulu.

Kieku ma jeżistux il-partiti: il-Gonzi jieqaf iħalli lil niesu jwaqqgħuh għan-nejk quddiem l-Ewropa kollha.

Kieku ma jeżistux il-partiti: Il-Ħaddiem ikollu unions li jaraw l-interessi tiegħu.

Kieku ma jeżistux il-partiti: Ma jiggvernawx il-bankiera, il-bankini, il-kuntratturi u l-gruppi farmaċewtiċi.

Kieku ma jeżistux il-partiti: L-iStati Uniti ta’ l-Amerika ma kinux jeżistu.

Kieku ma jeżistux il-partiti: It-theddid lill-kandidati fuq il-familji tagħhom u l-post tax-xogħol qatt ma kienu jeżistu.

Kieku ma jeżistux il-partiti: L-interessi tal-Poplu jiġu l-ewwel u qabel kollox u l-karozzi tal-ministri fil-belt Valletta ma jitħallewx mixgħulin tul id-diskors tal-budget kollu inkluża l-konferenza stampa quddiem kastilja.

Din hija r-raġuni li Norman Lowell u l-ħbieb tiegħu ta’ VivaMalta għadhom ħajjin forsi. Għax, sa issa, għad ma hemmx partit. U forsi mhux se jagħmlu wieħed, għax forsi fehmu li l-idea tal-partiti speċjalment f’Malta hija skaduta, burokratika, ma tistax teħles faċilment minn min qed jostakola, u huwa faċli tiddissoċċja ruħek minn min ikollu ideat mhux bħal tiegħek u jilbes ġiżirana b’Hitler fuqha mibgħut minn xi partit ieħor u flok ikun hemm tgħajjir ikun hemm opinjonijiet. Dak li jissejjaħ Creative Commons: inti għandek idea, jiena għandi idea. Ejja nfehmuha lil xulxin.

Meta ċ-ċittadin imur jivvota lil xi ministru ma jkunx qed jivvota lill-ministru iżda lill-aġent tal-kuntratturi, lill-aġent tal-bankiera, lill-aġent tal-vatikan u tal-gruppi farmaċewtiċi. Il-ministru nkarigat mis-sindku ma jkunx espert fuq is-suġġett imma jqabbad esperti oħrajn.

Mela x’nambuh lill-ministru? Mhux aħjar niffrankaw il-flus mill-aġent u nivvotaw għal nies esperti direttament fil-qasam u flok jitbassu u jitgħajjru fuq affarijiet li ma jifhmux iħallu f’idejn min jifhem u li għandu l-interess tal-pajjiż jiġi l-ewwel?

Permezz tat-teknoloġija ta’ l-informatika, min huwa vera ntelliġenti jaqbeż 170 ħanut minn 200, li skond l-Intelligent Community Forum Malta għandha u jixtri direttament minn fuq l-internet u jaqbeż l-aġent.

Il-kandidati għall-elezzjoni ġenerali fuq distrett wieħed għandhom ikunu :
- esperti fuq l-edukazzjoni
- esperti fuq l-ekoloġija / ambjent agrikolu (1)
- esperti fuq l-ekonomija
- esperti fuq l-enerġija / ambjent agrikolu (2)
- esperti fuq l-informazzjoni / teknoloġija / komunikazzjoni
- esperti fuq il-politika
- esperti fuq is-saħħa
- esperti fuq it-trasport
- espert li ma jħallix lill-vatikan jindaħal fid-deċiżjonijiet ta' l-esperti mtellghin mill-Poplu ta' kull reliġjon u tendenzi sesswali
(dan ta' l-aħħar fil-każ noqgħod jien)

Il-General Executive Director Manager ikun il-Poplu li qabel dan l-espert jieħu kull deċiżjoni għandu jintalab il-permess tal-Poplu u jiġi nfurmat kemm bil-vantaġġi u kemm dawk li m’humiex.

Jekk dan l-espert ma jagħmilx xogħolu sewwa, jiġri bħal ma jiġri f’kull kumpanija oħra. Dan l-espert jitkeċċa u tinħareġ vacancy fuq it-Times immexxija wkoll minn editur magħżul mill-Poplu.

Il-partiti huma l-millennium bug tad-demokrazija.

Għalhekk Sawlu baqa’ ħaj meta gidmitu l-lifgħa. Għax il-velenu mar kollu fil-partitokrazija!

Dan Sawlu ukoll ghamel partit f'Malta. Wara ftit mar hu stess b'volontà tieghu lejn Ruma biex jaqtghulu rasu!