Bandritt

għafas hawn biex tara l-billboard oriġinali

Illum qed inħossni iżjed Ewropew mis-soltu.

L-impjegat tagħna Gonzi qabel mat-trattat ta’ l-Unjoni Ewropea mingħajr ma ħa il-permess tiegħi u tiegħek.

B’hekk se nisfrutta mill-Ewropa tiegħi, u mill-flus dedikati għall-billboards u niġġieled għad-drittijiet tiegħi. Se nimxi mal-parir tal-billboards tat-triq u se nipprova nieħu dak li hu tiegħi ma’ l-Internet Service Provider tal-GO.

Qabel il-GO, kont klijent ma’ ISPs oħrajn:

ma’ l-Onvol fejn il-browsing kien slow immens u dak iż-żmien kienu jagħlqu l-ports ta’ l-instant messaging u llum jagħlqu l-cache. Ma’ l-Onvol ma tistax tibgħat l-istess e-mail lill-iżjed minn għaxar riċevituri.

mal-Euroweb fejn id-download limit kien jinżel mix-xejn.

mal-Camline li ddeċidiet li tagħlaq u għaddiet lill-klijenti tagħha lil maltaNET.

maltaNET kien għalija l-aqwa ISP ta’ Malta. Qatt ma kelli problema waħda. Il-Customer Care forsi kien fqir imma raġuni valida għax il-Customer Care ma konniex niġu bżonnu.

Il-maltaNET llum saret GO u għandha Customer Care ta’ 24 siegħa. U bir-raġun. Il-każ tiegħi beda f’Mejju/Ġunju 2007 meta l-Internet beda jinqata’ mix-xejn. Ma stajtx inwaħħal fil-maltaNET għax kont naf is-serjetà kbira li kellhom. B’hekk ġibt l-Electrician u Network administrator personali għax moħħi ma setax ilaħħaq ma’ dan il-misteru li filli l-internet jagħmel 4 ijiem sewwa u 3 le.

Il-problema baqgħet għaddejja sa Settembru meta nzertajt dħalt fil-forum ta’ x.com.mt u nara li l-problema ma kinitx tiegħi biss. Nidħol lura għax-xogħol u l-istudenti li qegħdin mal-GO jgħiduli li kollha għandhom l-istess problema u kemm il-darba ċemplu lill-Customer Care tal-GO.

Inċempel lil GO u jgħiduli li l-problema ma jafux biha! Aħseb u ara s-soluzzjoni.

Ftit jiem wara wieħed qalli li l-problema kienet mil-linja ta’ barra u li l-linja ta’ ġewwa kienet perfetta. Kelli nieħu t-time off u ġie tal-GO id-dar tiegħi (Maltacom branch) u qalli li l-linja ta’ barra kienet taħdem perfettament. Imma l-Internet xorta ma ried jaħdem b’xejn.

Wara li telaq it-technician f’daqqa waħda l-internet ħadem u fil-week-end reġa’ telaq. Telaq eżatt fl-ewwel puntata ta’ Xarabank fil-10.50p.m. Peppi kien qed ifittex lil McCann u l-modem tiegħi kienet qegħda tfittex connection. L-istreaming tad-di-ve weħel.

Fil-week-ends l-internet rari jkun qed jaħdem u jibda jilgħab eżatt kull nhar ta’ Ġimgħa fil-10.50p.m. Fil-programm ta’ Xarabank dwar il-budget x’ħin fl-aħħar kont qed naqbad is-suġġett, inqatgħet il-connection.

Ħafna minnkom isaqsuni biex naqleb l-ISP. Jekk inti tixtri karozza u tiġi mnejjka, tmur tixtri karozza oħra?

Irrid is-servizz li nħallas għalih. U ta’ meta ma ħadtx is-servizz irrid nitħallas lura b’xi mod. Jiena Ewropew issa, bit-trattat ukoll! Mela la bit-trattat, għandi niġi trattat sew!

L-ittra lill-għaqda tal-konsumaturi ta’ Malta :

21 Ottubru 2007

Għażiż Segretarju Ġenerali ta’ l-għaqda tal-konsumaturi ta’ Malta,

jiena hawn taħt iffirmat, konsumatur li nħallas minn qabel is-servizzi ta’ l-Internet li tipprovdi l-kumpanija GO.

Minn Mejju/Ġunju 2007 beda jkolli l-problemi fuq l-Internet :

1. Id-download limit tiegħi allokat beda u għadu sal-lum jinżel waħdu u b’hekk ma nkunx nista’ nutilizza s-servizz. Is-soluzzjoni li sibt waħdi kienet li nitfi l-modem u nerġa’ nixgħelu.

2. Il-connection ta’ l-Internet tinqata’ ta’ spiss. Bejn wieħed u ieħor 4 darbiet fil-ġimgħa l-iżjed fil-week-ends. Is-soluzzjoni li sibt waħdi hija li nżomm il-linja okkupata (lejn fax machine) u b’hekk qiegħed inħallas ukoll il-pulses tal-GO stess.

Tal-GO jafu b’din il-problema tiegħi u saħansitra rappreżentant tal-Maltacom ġie d-dar tiegħi imma soluzzjoni sal-lum ma nstabitx. Technician isostni li l-linja ta' barra hija bil-ħsara u ieħor isostni li għandi kollox tajjeb.

Waħda mir-raġunijiet li tal-GO indirizzaw li kelli din il-problema kien minnħabba xita u riħ. Jekk kienu qed jirreferu għall-Italja kellhom raġun imma hawn Malta fis-Sajf l-unika xita li kienet tinżel kienet mill-qara l-isfel bl-għaraq li kien joħroġli. Ironikament, meta tkun ix-xita, l-internet jaħdem. Forsi l-effett tar-raġġi tal-qawsalla mela?

Ankè biex nibgħatlek din l-e-mail ġejja bit-torturi għax ma jridx jaf li jaħdem. Jiġi u jitlaq. Jiġi u jitlaq. Qisu bħall-għasfur li bena bejta fil-ħofra tal-ħajt tal-kamra tas-sodda. Meta jfettillu jiġi jittawwal lill-uliedu jsaffru! Isaffru bħas-sett tat-telephone meta l-Internet ikun mixgħul.

Nitolbok titlob lill-kumpanija GO, broadband branch, li ssolvili l-problema tiegħi kemm jista’ jkun malajr u kif ukoll tħallasni lura, mhux neċessarjament bi flus, tas-servizz li jiena ma utilizzajtx u kelli dritt nutilizza.

Biż-żmien skoprejt li din il-problema tinsab ġo ħafna djar abbonati mal-GO. Ftit minnhom jidhru li solvewha definittivament.

Attwalment inħallas Lm13.85c fix-xahar fejn il-pakkett ikopri li jkolli użu ta’ l-internet 24 siegħa kuljum mingħajr interruzzjonijiet. Xtrajt ukoll Centralised filter ta’ Lm7.00c skond pariri tal-GO imma b’dan il-filter l-internet waqaf jaħdem kompletament.

Ċempilt lil GO u qaluli biex naqla’ d-Distributor filter li huwa imwaħħal mas-sett tat-telephone. Dan il-filter ingħatali b’xejn imma l-problema ma ssolvitx sal-lum.

Ninsisti, u dan bi dritt, biex nieħu d-drittijiet tieghi!

Mehmuż sib il-formola ta’ l-ilment tiegħi mniżżla mill-web-site tagħkom.

Dejjem tiegħek u miegħek,


Sandro Vella
konsumatur



Ir-raġuni li m’għamiltx l-istess ma’ l-ISPs l-oħrajn hija li ma kontx għadni ġejt ispirat mill-billboards fit-toroq.

Onestament, jiddispjaċini li kelli nasal s’hawn. Għax nista’ ntellef il-kredibilità u ssostenibilità lil Gonzi meta jgħid li Malta huwa t-tieni pajjiż fl-Unjoni Ewropea fl-użu tat-teknoloġija informatika.

Għad fadal żoni f’Malta li r-reception tal-mobile ma tkoprihomx!
Forsi biex nevitaw il-kankru. Kemm għandhom qalbhom tajba!

Ninfurmakom bl-iżviluppi jekk inkun għadni niġġerra barra.

L-e-mail ta’ l-għaqda tal-konsumaturi huwa : info@camalta.org
Biex tniżżel formola ta’ ilment għafas hawn.




Trid tiġi kkonsultat b'referendum fuq it-Trattat ta’ l-Unjoni Ewropea? Jekk iva, iffirma hawn.